يااااااااااااااااه

بقالي بتاع سنة مكتبتش حاجة هنا

حاجات كتير حصلت من السنة اللي فاتت

المهم

اعداء النجاح

اعداء النجاح كتير جداً جداً جداً ... و ساعات بتلاقيهم عاملين نفسهم صحابك

بس هم يا ترى اعداء نجاح ليه ؟

لأن هم نفسهم فاشلين و نفسهم يشوفوا فشلهم في ناس تانية

تخيل انك تكون مصاحب انسان فاشل ... و يكون صاحبك الفاشل ده نفسه يشوفك بتقع ... عشان مايبقاش لواحده و يقدر يعايرك

انا لما بكلمه عن فشله ... ببقى عايز اخليه يعقل و يفكر .. انا مش عايز منه حاجة ولا هعوز منه حاجة

انما هو ... عامل نفسه صريح ... و نفسه يشوفني بقع في حاجة واحدة عشان يقدر يتكلم زي ما بكلمه

بس الحمدلله

ربنا بيكرمني دايماً

كفاية كده

سلام

H.W

صباح العسل

شيماء بعتتلي حاجة اسمها (( الواجب )) ...

لقيت الـ (( واجب )) ده بيتكلم عن (( اتكلم عن ست اسرار قد لا يكتشفها من يقابلك للمرة الاولى ))

اولا انا ليا كلمة عايز اقولها قبل ما ابدأ

---------------------------

• كمعلومة لكل واحد هيقرا الكلام ده ان مفيش حد بيكتشف اسرار اللي قدامه من اول مرة يكلمه لأن الاسرار بتبقى مدفونة في جزء من الانسان , و دي وجهة نظري .




• عشان ابقى صريح مع كل اللي هيقرا الكلام ده ... انا طبعاً مش هقول اسراري .. انا هقول الحاجات اللي محدش هيكتشفها في شخصيتي لما يقابلني اول مرة .




• طبعاً انا مش قصدي اي اهانة و مع كل احترامي و تقديري للي عمل الـ (( واجب )) .

-------------------------------------------------------------

أذكر اسم من طلب منك حل هذا الواجب

م / شيماء علي

أذكر القوانين المتعلقة بهذا الواجب

من انهاردة مفيش قوانين ... انا القوانين

تحدث عن ستة أشياء لا يكتشفها من يقابلك للمرة الاولى

(( يعني اتكلم عن ست حاجات اللي يشوفك اول مرة مايتكشفهاش ))

No.1

لما حد بيشوفني اول مرة ... مش بيبقى عارف اني بعرف اكتشف اللي بيكدب بكل سهولة و يسر

No.2

اللي بيكلمني اول مرة مش بيبقى عارف اني بتنرفز اوي من الغباء

يعني ممكن لو قدامي حد غبي احطه في قزازة بلاستيك و اضرب فيه من كتر الغيظ

No.3

اللي بيكلمني اول مرة احياناً ممكن يفتكرني غلبان و يتضحك عليا بكيس شيبس و قزازة بيبس

مش بيبقى عارف اني ممكن اضحك عليه هو و ناسه بكراتين شيبسي و اربعين ليتر بيبسي

حد فهم حاجة ؟؟؟

No.4

اللي يكلمني اول مرة في السياسة هيحس اني عضو فعال في الحزب الوطني

هو بقى مش عارف اني في حالي و مش عارف حاجة في السياسة غير ان مصر بلد ديموقراطية

No.5

اللي بيكلمني اول مرة مش بيبقى عارف ان انا بحب الشوكولاتة

(( و في مقولة اخرى الشوكولا ))

No.6

آخر حاجة .... اللي بيكلمني و بيغلط .. يبقى مش عارف هو بيكلم مين

-------------------------

NOTE

ممكن اكون غيرت المطلوب من الواجب ... بس انا حسيت ان كده احسن

--------------------------------------

صباح الصباح

No Comment

بعد ماتش الاهلي و الزمالك

----------------------------------------------------

أنا : صباح العسل يا ناس يا بصل

الزمالكاوي : يا اهلاً

انا : هاردلك يا بوب ... انشاء الله الموسم حلو و هتعرفوا تكسبوا بتروجيت و الاتحاد تاني زي زمان

الزمالكاوي : يا عم احنا قطعناكوا

انا : ده امتى ده ؟

الزمالكاوي : في الماتش يا عم

انا : امممممممم ... شكلك كنت بتتفرج على ماتش تاني يا بوب

الزمالكاوي : مش مشكلة ....

انا : مش مشكلة ايه بس ... شوفت احمد حسن عمل ايه و شوفت الواد جيلبيرتو عمل ايه ... اسكت بس

الزمالكاوي : هناخد كاس السوبر

انا : في المشمش

الزمالكاوي : انشاء الله ربنا هيوفقنا و هنكسبكوا و ربنا هيبقى معانا و مع اللعيبة و انا وشي حلو و هروح الاستاد

و هشجع من قلبي و اغني و اعمل شعارات

انا : حيلك حيلك يا معلم .... في ايه ... ده ماتش لا راح ولا جه ... غير كده انتوا عايزين تكسبوا الأهلي ؟؟

الزمالكاوي : اه طبعا

انا : في المشمش ... انت بتحلم

الزمالكاوي : ليه يا عم ... طب ما احنا من حقنا نحلم

************************

هنا وقفت مع نفسي و مع الكلمة دي

- احنا من حقنا نحلم -

صح ... احنا من حقنا كلنا اننا نحلم .. و نفكر في المستقبل و ازاي نخليه حلو

من حق كل واحد انه يحلم يبقى مهندس او دكتور او طبيب او حتى شاويش

ليه محدش منا بيحلم .... انا عن نفسي بحلم و انشاء الله احقق حلمي

في ناس اتولدوا عشان يتحطوا في موقف و يمشوا فيه

يعني مثلاً في واحد اتولد و باباه غصب عنه خلاه مهندس ... و هو مش عايز يبقى مهندس

واحد تاني ابوه خلاه ظابط بس هو مش عايز .... هو مش شايف نفسه ظابط

واحد تاني بيحلم انه يجيب عربية جامد ... واحد تاني بيحلم انه يجيب يخت ..

واحد تاني احلامه على قده

واحد عايز شقة يفعد فيها هو و عيلته ... واحد نفسه في مرتب كويس يكفيه هو و اهله من غير ما يستلف

واحد بيحلم بواحدة حلوة بنت حلال يتجوزها ... واحد بيحلم انه يتجوز واحدة رقاصة

انا شايف ان دي كلها احلام و في اكتر من كده كمان ... بس ده اللي جه في دماغي

ليه الواحد بييجي في لحظة واحدة يلاقي حلمه اتهدم ... و يلاقي نفسه اتحطم

ممكن عشان 3 حاجات

اول حاجة : يمكن عشان انت معملتش كويس عشان توصل لحلمك

تاني حاجة : ممكن عشان في حد مستقصدك و عايزك ماتوصلش لحلمك

تالت حاجة : ربنا عايز كده (( طبعاً اول حاجة و تاني حاجة اسباب لتالت حاجة .... حد فهم حاجة ؟؟ ))

فجأة ..................

الزمالكاوي : ايه يا عم اللي انت بتقولوا ده .... هي ناقصه كلاكيع ... مش كفاية الزمالك اللي حارق دمنا و مخلي واحد

زيك يكلمنا كده

انا : تصدق بقى اني غلطان عشان بكلم واحد زيك ... يالا ياض من هنا ياض

و خلص الحوار و المناقشة

....................................................................

شوفتوا بقى ازاي احنا مش بنحب نواجهه الحقيقة ؟؟؟؟

صباح الصباح

Euro 2008

من شوية كده كنت بتفرج على ماتش كورة بين اسبانيا و ايطاليا في دور الـ8 بتاع اليورو 2008

ايطاليا خسرت بضربات الجزاء ... و طبعا دي حاجة فرحتني جدا جدا

ايطاليا لعبت وحش الماتش كله و معملتش حاجة عدلة و حظها وحش ... بس كان عندهم امل انهم يكسبوا ويتأهلوا

بس في الاخر خسروا

-------------------------------------------------------------------------------

المقدمة دي مالهاش علاقة باللي هكتبه انهاردة غير بحاجة واحدة

الخسارة


الخسارة ( من وجهة نظري ) من اسوء انواع النعذيب و القهر في العالم و لو عايز تحرق قلب حد خليه يخسر ... انشالله تخليه يخسر في دور بصرة

الخسارة وحشة ليه

لأن الخسارة دي بتبقى ناتجة عن مجهود جامد و كتير ... بس المجهود مكنش صح

مثلا ً في الكلية

الخسارة في الكلية تعتبر السقوط

لأن الواحد بيتعب و بيتبهل و بيطلع عين اللي جابوه و في الاخر بيسقط ( ده في هندسة بس )

الواحد بيبقى بذل مجهود عالي و يلاقي كله طار في الهوا

دي خسارة كبيرة اوي و بتخليك تخسر وقت و مجهود


نيجي لنوع اخر من انواع الخسارة

اللي يكون خاطب واحدة بنت و عمال يلف الدنيا كلها عشان يفرش بيتهم ( عش الزوجية ) و في الاخر يطلع مفيش نصيب ( اصل الحاجات دي نصيب يا اخوانا )

ده برضه نوع من انواع الخسارة

خسر واحدة كان بيحبها

خسر وقت ضيعه معاها

و خسر فلوس اتصرفت مالهاش لازمة


نروح لنوع تاني من انواع الخسارة

الواحد لما يتحط في موقف .. و هو بيقول أه .... و ضميره بيقول لأ

ده كده برضه خسر

بس خسر حاجة جامدة اوي ...

خسر نفسه


الخسارة دي حاجة غريبة جدا و عجيبة اوي

لأنها بتاخد منك حاجة مهمه و بتديك حاجة تانيه مهمه

يعني لما سقطت في مادة انت كده خسرت ... بس اتعلمت ازاي تزاكرها صح بعد كده

لما فطعت او فسخت او طلقت خطيبتك ... انت كده خسرت ...... بس اتعلمت ازاي تنقي المرة الجاية

بس الواحد لما خسر نفسه ... صعب يتعلم من خسارته


اهم حاجة من الخسارة ان الواحد يتعلم منها . لأن الخسارة ( من وجهة نظري ) بيتسبب بيها الشخص نفسه من البداية

يعني الخسارة غطلة يرتكبها الشخص صاحب الخسارة مما يؤدي في الاخر الى خسارة


طبعاً الحاجات دي كلها نصيب و مكتوبة من قبل ما الانسان ما يتولد

و طالما هي كده ... يبقى نحاول بقدر الامكان اننا نتعلم من خسارتنا او من الغلطة اللي بوظت الدنيا

يجعله عامر

صباح الصباح

Love Is What The Trouble Is !!!

الكلام ده صح ولا ايه رأيكم ؟والله انا شايف الكلام ده زي الفل و مفيهوش غلطة صوغنونة

الحب بيبقى مشكلة كبييييييييييييرة اوي بالنبسة لناس كتيرة ...

طبعا كتير هيفتكرني بتكلم عن الحب اللي هو انك تاخد واحدة بت و تجري بيها على الكورنيش

لأهو ده نوع من انواع الحب ...

بس مش ده اللي قصدي عليهالحب اللي قصدي عليه هو لما الانسان يحب نفسه

ساعات بتبقى حلوة و ساعات بتبقى وحشة

طب نسأل هنا ...

تبقى حلوة امتى ؟

اقولكوا انا تبقى حلوة امتى

لما الواحد يحب نفسه و يحب يطور نفسه عشان يبقى كويس و حلو

يحب نفسه عن طريق شكله او شخصيته ..

المهم انه بيطور نفسه عشان بيحب نفسه و عايز يبقى انسان كويس و مش على حساب حد

في بقى اللي بيحب نفسه على حساب الناس

و هنا بتبقى وحشة

لأن الانسان كده بيبقى بيفضل نفسه على اي حد و شايف نفسه بوب المنطقة

" لا يؤمن احدكم حتى يحب لأخيه ما يحب لنفسه "صدق رسول الله صلى الله عليه وسلم

حب يا عم انك تبقى كويس و حلو

حب انك تبقى صاحب حديد عز

بس ماتتمناش لغيرك انه يضيع او ينتهي لمجرد انك تنجح

انت كده مش بتعلى ... لأ ... ده اللي حواليك هم اللي بيقلوا عشان كده بتحس انك بتعلى
كفاية كده انهاردة عشان تعبت ....

صباح الصياح

ReBloging

This a BRAND NEW damn Blog